Asmi Shinde💁: नावात काय आहे...??

Asmi Shinde💁: नावात काय आहे...??

खूप साऱ्या आठवणी...???
लहानपणापासून आत्तापर्यंत खूप नावांनी मला हाक मारणारी वेगवेगळी लोकं माझ्या आयुष्यात आलीत...सर्वांत पहिलं नाव जे आई-पप्पांनी दिलं.....'प्रमोदिनी'.!

हे फार कोणाला नाही माहित पण माझं सर्वात पहिलं नाव हेच. अर्थात मलाही खूप वर्षांनी कळलं. कारण तोवर फक्त 'रुपाली'याच नावाने मी स्वतःला ओळखत होते. आईने सांगितलं प्रमोदिनीचं टोपणनाव 'पमे','पमा' झालं असतं म्हणून तिने माझं नाव बदलून रुपाली असं ठेवलं. माझी बहिण दिपाली आणी मी रुपाली. असं काहिसं ते ठरलं. मग पुढे त्याचं टोपण 'रुपा' झालं. ठिकेय..! पमे पेक्षा बरंच वाटतं ते.

पुढे शाळेतल्या चिडवा-चिडवीत रुपाचं 'पारु'...रुपाली चं 'पाली' 'लीपारु' वगैरे वगैरे झालं. आणी मला माझ्या नावाचा राग यायला लागला.
एकदा गावी कोणीतरी मला विचारले "तू मंबयीच्या नंदूनानांची रुपी ना गं..??"🙄. आणी मला माझ्या नावाच्या आणखी एका रुपाचा साक्षात्कार झाला. तेव्हा "पारु गं पारु...." गाणं दर गणपतीत स्पीकरवर लावलं जायचं. आणी मी अजिबात न ऐकल्याचं नाटक केलं तरी आमची चाळीतली मित्रमंडळी मला चिडवायला हेच गाणं म्हणून दाखवायचे. जरा कळायला लागलं तशी ही चिडवाचिडवी कमी झाली.

मग कॉलेजमध्ये मला आणखी एक रुपाली भेटली. आमची मैत्री सारख्या नावामुळेच झाली. एकाच वर्गात एकाच बाकड्यावर बसायचो दोघी. कोणी हाक मारली की कनफ्युजन. त्यावेळी 'पुजा'ला 'पु...' अशी हाक मारायची फॅशन आलेली म्हणून तिने मला 'रु...' म्हणायला सुरुवात केली. तिने बसस्टॉपवर 'हे....रु...' अशी हाक मारली की बसच्या रांगेत सगळेच माझ्याकडे मी नक्की कुठल्या ग्रहावरची आहे ..? असे कटाक्ष टाकायचे. पुढे मी ठरवलंच लग्नानंतर नाव बदलायचं. ज्यात 'पाल' येणार नाही आणी पारु तर अजिबात नाही असं एखादं नाव ठेवायचं.

सातवीत असताना माझं नाव 'सुजाता' असायला हवं असं वाटायचं... पण मग त्यातलं सुजणं खटकायला लागलं. आणी ते कँसल झालं. 'सुहासिनी' पण आवडलेलं पण कुणा सुहास नावाच्या मुलावरुन चिडवतील म्हणून तेपण कँसल. मग लग्नाच्या वेळी  मी जिथे जॉबला होते तिथे एका 'वेदांगी' नावाच्या मुलीशी मैत्री झाली. आणी मी पक्कं केलं लग्नानंतर माझं नाव 'वैदेही' किंवा 'वेदांगी' असणार. पण मग पुढे वेदांगी चं लग्न ठरलं आणी तिनेही तिचं नाव बदलणार असण्याचं सांगितलं. म्हणे तीन अक्षरी नाव जाम बोर वाटतं., आता दोन अक्षरी सुटसुटीत नावांची फॅशन आहे. मग मीही वेदांगी कँसल करुन दोन अक्षरी नाव शोधायला लागले. परी, किर्ती, कृपा,क्षमा, सिया, रक्षा, प्रिया......
नवरोबांनाही कामाला लावलं... दोन अक्षरी नाव शोधा म्हटलं. त्यांनी 'क्षिप्रा' सुचवलं. नाव छानय पण मला उगाच म्हाताऱ्या बायका 'शिपरा' म्हणून हाक मारताना दिसल्या. नकोच ते झिपरं नाव.!
फायनली 'अस्मि' आवडलं. आणी तेच फिक्स झालं.

पण लग्नातच कोणीतरी दवंडी पिटताना ऐकलं " पाहुण्यांनी आपल्या रुपाचं नाव 'अस्मिता' ठेवलंय...!"🤕

आज अहोंनी अस्मि अशी हाक मारली कि हा गंपू त्यांची री ओढत...'आच्छी...'म्हणतो मला....😭😭
@$m!